АНУ-ын Ерөнхийлөгч Б.Обамагийн эцгийн төрсөн нутаг Кенийн Когело тосгоны 105 настай мэргэч түүнийг энэ удаагийн сонгуульд ялалт байгуулна гэж төлгө буулгажээ. Элдэв янзын чулуу, дун, хясаагаар мэргэлдэг Жон Димогийн төлгөнд нутгийнх нь хүү хол зөрүүтэй ялалт байгуулах нь тодорхой гэж буусан аж. Тийм ч учраас Б.Обамагийн ялалтыг тэмдэглэхээр Когело тосгоныхон аль хэдийнэ бэлтгэж эхэлжээ. Б.Обама 2008 онд Ерөнхийлөгч болсноос хойш түүний гэр бүл Когело тосгоныхоо од болсон юм. Тосгоны сургуулийг  Обамагийн нэрэмжит болгосны зэрэгцээ нэгэн гудамжийг Обамагийн эмээгийн нэрээр Мама Сара Обамагийн гудамж гэж нэрлэжээ. Түүнчлэн Б.Обамагийн эцгийн нэрэмжит спортын тэмцээнийг жил бүр зохион байгуулдаг болсон байна.

Кенигээр зогсохгүй өөр бусад оронд ч мэргэч төлгөч нар АНУ-ын Ерөнхийлөгчийн сонгуульд хэн ялахыг таах гэж оролдож, бас амжилт хүссэн янз бүрийн ёслол үйлдэж байна. Тухайлбал, Перугийн бөө нар Б.Обама, М.Ромни хоёрт хоёуланд нь амжилт хүссэн ёслол үйлджээ. Гэхдээ Перугийн бөөгийн үзэж буйгаар Б.Обама сонгуульд ялахаар байгаа гэнэ.