Өнөөгийн ерөнхийлөгч Барак Обама, Бүгд найрамдах намаас нэр дэвшигч Митт Ромни нарын төрийн тэргүүний төлөө өрсөлдөх АНУ-ын ерөнхийлөгчийн сонгууль маргааш болно. Хамгийн сүүлд Огайо, Колорадо мужид болсон урьдчилсан санал асуулгаар Барак Обама тэргүүлж явна. Сонгуулийн эцсийн дүнд шийдвэрлэх нөлөө үзүүлэхүйц Огайод гэхэд л Барак Обама сонгогчдоос 63 хувийн санал авсан бол Митт Ромни 35 хувь авчээ. Колорадод нийт сонгогчдын гуравны хоёр нь оролцсон байхад өнөөгийн ерөнхийлөгч Обама гурван хувиар  түрүүлсэн байна. Флорида мужид ч гэсэн Обама ялна гэдэгтээ итгэлтэй байгаа юм байна.
Маргааш болох сонгуульд Колорадо, Флорида, Айова, Мичиган, Невада, Нью-Гемпшир, Огайо, болон Виржина муж улсын сонгогчдын санал шийдвэрлэх үүрэгтэй гэж ажиглагчид үзэж байна. Огайо бол Митт Ромнигийн хувьд яахын аргагүй чухал үүрэгтэй. Өмнөх сонгуулиудад Бүгд найрамдах намаас нэр дэвшсэн хүн Огайод ялалгүйгээр цагаан ордны эзэн болж байсан түүх байхгүй юм байна.