Зургаан жилийн өмнө Бээжинд ажилладаг Ху овогт инженер нь “Мо Янь Зуй” гэдэг нэртэй архины брэндийг албан ёсоор бүртгүүлжээ. Үүнийг орчуулбал “Согтуу үедээ дуугүй яв” гэсэн утгатай ч өөрөөр “Согтуу Мо Янь” гэж орчуулж болох юм байна. Гэтэл энэ жил Хятад зохиолч Мо Янь утга зохиолын салбарт Нобелийн шагнал хүртэж улсынхаа хамгийн алдартай хүмүүсийн нэг болсон билээ. Үүний дараагаар Нобелийн шагналтантай холбоотой юм болгон онцгой моодонд орсон нь ойлгомжтой. Улмаар архи үйлдвэрлэдэг хэд хэдэн компани “Ху” овогтод хандан “Согтуу Мо Янь”-иа зарахыг санал болгож. Мань эр харин хамгийн ашигтайг нь сонгоод 10 сая юаниар зарсан нь энэ аж. Мо Янь гэдэг нь Нобелийн шагналт 57 настай зохиолч Гуань Моегийн хоч бөгөөд орчуулбал “дуугүй, чимээгүй” гэсэн утгатай юм байна.
