НҮБ-ын Ерөнхий нарийн бичгийн дарга Бан Ги Мун хоёр Солонгосын асуудлаар умард Солонгост айлчлах хүсэлтэй байгаагаа мэдэгджээ. Тэрээр Сөүлийн энхтайвны шагнал гардан авах үеэр ингэж мэдэгдсэн байна.  Бан Ги Мүн хэлэхдээ “Солонгосын хойгийг цөмийн зэвсэггүй, энхтайван, амар амгалан болгохын тулд хувийнхаа зүгээс хувь нэмрээ оруулахыг хүсч байна. Магадгүй нөхцөл байдал зүгширсэн үед Хойд Солонгост айлчилж ч болох юм” гэжээ. Түүний гардан авсан Сөүлийн энхтайвны шагналыг 1988 оны Сөүлийн зуны олимпын дараа 1990 оноос олгож эхэлсэн түүхтэй. Гэхдээ энэ шагналыг гардсан анхны солонгос хүн нь Бан Ги Мун юм. Тус шагналыг 200 мянган ам.доллар дагалддаг бөгөөд тэрээр шагналын мөнгөө  НҮБ-д ажиллаж байгаад амь насаа алдсан ажилтнуудын ар гэрт хандивлахаар шийджээ.