Улс төрийн хэрэгт хилсээр хэлмэгдэгсдийн дурсгалд  зориулж ОХУ-ын Самар хотноо Юрии Гагарины нэрэмжит цэцэрлэгт хүрээлэнд 22 жилийн өмнө босгосон хөшөө сураггүй алга болжээ. Самар хотын хүний эрхийг хамгаалах, сайн дурын байгууллагын төлөөлөгч Владимир Семенов “Энэ бол зориуд зохион байгуулалттай, хорон санаагаар үйлдсэн хэрэг. Түүнээс биш мөөг түүсэн  юм шиг бүхэл бүтэн хөшөө ор сураггүй алга болно гэж байхгүй” гэсэн байна. Хүний эрхийг хамгаалагчид энэ асуудлаар хотын захиргаа, хууль хяналтын байгууллагад хандсан байна. Тэр газар нь хэлмэгдэгсдийн дурсгалд зориулсан шинэ цогцолбор барих гэж хөшөөг зайлуулсан байх гэж орон нутгийн хэвлэлүүд таамаглаж байгаа ч хотын мэрээс яриа, тодруулга  авч чадаагүй байна.