Хятадын Ганьсу мужийн иргэн, хоёр хүүхдийн эцэг 27 настай түвд эр Лхамо Киеб  Далай ламыг Түвдэд ирэхийг дэмжсэн уриа барьж байгаад өөрийгөө шатаасан байна. Хууль сахиулагчид түүнийг аврахаар оролдсон ч тэрээр хүндээр түлэгдсэний улмаас нас баржээ. Түвдэд болж байгаа үйл явдал, тэдний амьдрал хүнд байгаа зэргээс болоод аравдугаар сар гарснаас хойш дөрвөн ч хүн эсэргүүцлээ илэрхийлж өөрийгөө шатаагаад байгаа юм. Лондонд төвтэй хүний эрхийн “Free Tibet” байгууллагын тооцоогоор Түвдэд явуулж байгаа Хятадын эрх баригчдын бодлогыг эсэргүүцэж 2011 оны гуравдугаар сараас хойш нийтдээ 60 хүн өөрийгөө шатаасан байна.
Түвдийг 1950 онд хятадууд эзэлснээс хойш нутгийн иргэд бүс нутгаа тусгаар тогтнуулах гэж, ядахад арай илүү автономит эрхтэй болгох гэж чармайсаар ирсэн юм. Хятадын засаг захиргаа үүнийг нь эсэргүүцэж Түвдийг өөрийнхөө салшгүй бүрэлдэхүүн хэсэг гэж үзсээр байгаа юм.