Apple компани Ази дахь хамгийн том дэлгүүрээ Бээжинд Хориотой хотын хажууханд нээлээ. Өнөө өглөө нээлтээ хийсэн тус дэлгүүрийн анхны үйлчлүүлэгч болж, гарын бэлэг авах гэсэн хүмүүс өчигдөр оройноос дараалалд зогссон тул “Apple”-ийн шинэ дэлгүүр өнөөдөр хүний хөлд дарагдаад байна. Дэлгүүр яг хэдий хэр том гэдгийг компанийн зүгээс мэдэгдэхийг хүсэхгүй байгаа ч 300 ажилтантай, гурван давхар байртай энэ дэлгүүр “Apple” салбар дэлгүүрийн хэмжээнд эхний гуравт лавтай орох гэнэ.  
Бээжингийн арилжаа наймааны хамгийн хөлтэй гудамжийн нэг Ванфужинд нээгдсэн энэ дэлгүүр “Apple”-ийн Хятадад нээж буй зургаа дахь салбар болж байна. Үүнээс гурав нь Шанхайд, үлдсэн гурав нь эх газарт байдаг юм.  Дэлхийн хамгийн том зах зээл болох Хятад дахь борлуулалтаа нэмэгдүүлэхийн тулд “Apple” компани энэ оны төгсгөл гэхэд 25 салбартай болсон байх төлөвлөгөөтэй ажиллаж байгаа гэнэ. Ийнхүү салбаруудын тоогоо огцом нэмж буй нь Хятад дахь эрэлт хэрэгцээ асар их байгаатай холбоотой. Энэ оны гуравдугаар улиралд тус компанийн Хятад дахь орлого 48 хувиар өсч, оны өмнөхөөс даруй 5,7 тэрбум ам.доллараар нэмэгджээ.