Ливаны Бейрут хотод хэдэн хүний аминд хүрсэн томоохон дэлбэрэлт болж, тус улсын тагнуулын албаны удирдлагуудын нэг, бригадын генерал Виссам Аль Хассан нас баржээ. Улсынхаа нөлөө бүхий хүмүүсийн нэгд тооцогдох генерал Виссам Хезболла бүлэглэл болон Сири ямар холбоо харилцаатай болохыг шалгаж байсан ажлын хэсгийг ахалж байжээ. Бейрутын хамгийн хөл хөдөлгөөнтэй Ашрафия гудамжны ойролцоо болсон дэлбэрэлтийн улмаас найман хүн амь үрэгдэж, хэдэн арван хүн шархдаж гэмтсэн юм. Гэмт этгээдүүд машинд бөмбөг байрлуулсан байжээ.
Генерал Виссам Сирийн удирдагч Башар аль Ассадын дэглэмийг ил тод эсэргүүцдэг, түүний санхүүжүүлсэн гэх нэгэн дэлбэрэлтийн хэргийг шалгаж байжээ. Тийм ч учраас энэ хэргийн цаана Башар Ассад байгаа гэж Ливаны сөрөг хүчнийхэн буруутгаж байна. Өнөөдөр Ливаны эрх мэдэлтэн, улс төрийн хүчнүүд Сирийн талаар хоёр хуваагдчихаад байгаагаас энэ хэрэг гарсан гэж ажиглагчид үзэж байгаа юм. Олон хүний цус урсгасан энэ хэргийн террорист халдлага хэмээн НҮБ-ын тэргүүн Бан Ги Мүн, АНУ-ын Төрийн нарийн бичгийн дарга Хиллари Клинтон нар мэдэгдлээ.