УИХ-ын гишүүн Ж.Бат-Эрдэнэ цаг үеийн асуудлаар мэдээлэл хийлээ. Тэрбээр УИХ дахь МАН-ын бүлгийн дарга боловч өчигдөр хуралдсан бүлгийн хурлаас түүнийг огцруулж, УИХ-ын гишүүн У.Отгонбаярыг түр орлон гүйцэтгэгчээр томилох шийдвэр гаргаад буй. Мөн УИХ дахь МАН-ын бүлгийн албан ёсны сошиал хуудсаар өчигдрийн хурлыг дүрмийн бус болохыг мэдэгдээд байгаа билээ. УИХ-ын гишүүн Ж.Бат-Эрдэнэ “Өнөөдөр /2025.10.14/ хуралдах бүлгийн хурлын зарыг 24 цагийн өмнө зарласан байсан. Гэтэл нэр бүхий гишүүд бүлгийг хурлыг өчигдөр зохион байгуулсан. Тэр хурал бол хууль бус. Дүрэмд заасны дагуу бүлгийн нийт гишүүний олонх хүсэлт гаргасан бол хуралдаж болно. Гэхдээ хуралдааныг бүлгийн дарга товлож, зохион байгуулдаг. Нэгэнт зарлагдсан байсан хурлын өмнө хэсэг гишүүн дүрмийн бус хуралдаан хийсэн гэж үзэж байна. Тиймээс дүрмийн бус хуралдаанаас гаргасан шийдвэр дүрмийн бус. Намайг огцруулсан асуудалд би санал нийлэхгүй" гэлээ.
