Улсын хэмжээнд спортын шинэ төрлүүдийг хөгжүүлэх, спортын шинэ амжилтыг тогтоох, биеийн тамир спортын хөдөлгөөнд олон нийтийг хамруулах зорилготой “Монголын бүх ард түмний спортын наадам”-ыг нь 16 дахь удаагаа 2025 оны 9 дүгээр сарын 15-21-ний өдрүүдэд Баянхонгор аймаг, Улаанбаатар хотноо нэгэн зэрэг зохион байгуулж байна.Наадмын нээлтийн ёслолын үйл ажиллагаа Баянхонгор аймгийн “Баганат” талбайд ёслол төгөлдөр боллоо. 21 аймаг, 9 дүүргийн баг тамирчид жагсаж, Баянхонгор аймгийн Засаг дарга Д.Мөнхсайхан нээж үг хэлэв. Соёл, спорт, аялал жуулчлал, залуучуудын яамны Төрийн нарийн бичгийн дарга Б.Даваацэрэн хуран цугласан нийт баг тамирчид, зочид төлөөлөгчдөд мэндчилгээ дэвшүүллээ.
Монголын бүх ард түмний спортын зуны XVI наадамд олимпын 16, олимпын бус 2, оюун ухааны 2, хөгжлийн бэрхшээлтэй иргэдийн 8, нийт 28 спортын төрлөөр 21 аймаг, 9 дүүргийн 3400 гаруй баг тамирчид 879 багц медалийн төлөө өрсөлдөж байна.Баянхонгор аймагт гимнастик, спорт бүжиг, таеквондо, бадминтон, даам, бокс, волейбол, сагсан бөмбөг, самбо бөх, чөлөөт бөх, жүдо бөх, пауэрлифтинг, футзал, шатар, ширээний теннис, хүндийн өргөлт, дугуй зэрэг 17 спортын төрлийн тэмцээнийг 13 спортын заал, 1 талбайд зохион байгуулна.Улаанбаатар хотод байт харваа, буудлага, пара хөнгөн атлетик, тусгай хөнгөн атлетик, хөнгөн атлетик, пара жүдо бөх, хонхтой бөмбөг, диф волейбол, диф шатар, тусгай бочи, пара волейбол зэрэг 11 спортын төрлийн тэмцээнийг 4 спортын заал, 2 талбай, 1 танхимд зохион байгуулна.
