Зургийг олон нийтийн цахим сүлжээнээс авав
УИХ-ын гишүүн асан Ц.Цэрэнпунцагийн хүү Санжаачойпэл, "Таванбогд" группийн ерөнхийлөгч Б.Баатарсайханы хүү Амарсайхан, "Эрэл" компанийн ТУЗ-ийн дарга Б.Эрдэнэбат Тэмүүлэн нарын хүүхдүүдийн холбогдсон зодооны хэргийн бас нэгэн шүүх хурал өнөөдөр болох гэж байна.
Тодруулбал, хохирогч С-д хилийн хориг тавих эсэхийг өнөөдөр Дүүргийн эрүү, иргэний хэргийн хялбар ажиллагааны анхан шатны тойргийн шүүхэд хэлэлцэнэ. Хохирогчид хилийн хориг тавиулах хүсэлтийг прокурорын зүгээс гаргасан байна.
Зодооны хэргийн дараа хохирогч С солонгос улс руу эмчлүүлэхээр явсан. Хэсэг хугацаанд эмчлүүлж байгаад эх орондоо ирээд буцах гэтэл түүнд хилийн хориг тавих асуудал яригджээ. Энэ талаар хохирогчоор татагдсан С-ийн аав "Миний хүү эмчлүүлж байгаа эмнэлэг рүүгээ 9 сарын 15,16,17, 26-нд цаг аваад эмчилгээ, хяналтад явах гэж байтал хилийн хориг тавих саналаа шүүх рүү өгсөн гэнэ. Энэ арай хэтэрч байна шүү. Миний хүү эх орноосоо оргон зайлах, буруу зүйл хийсэн бол бусад шиг зугтах хулчгар эр биш" хэмээн цахим орчинд бичсэн байна.
Би өдийг хүртэл энэ хэрэг хэн нэгнийг хэлмэгдүүлэхгүй үнэн зөвөөр шийдэгдэх байх гэж харж чимээгүй байсын. Миний хүүг яллагдагчийн нүдийг хөхрүүүлсэн гэж яллагдагчаар татлаа за яаахуу үнэн нь олдох байх гээд бас чимээгүй л байлаа. Эцсийн шийдийг шүүх гаргана гээд бас итгэлтэй байгаа. Гэтэл эмчлүүлж байгаа эмнэлэгрүүгээ 9 сарын 15,16,17,26 нд цаг аваад эмчилгээ,хяналтад явах гэж байтал хилийн хориг тавих саналаа шүүхрүү өгсөн гэнэ. Энэ арай хэтэрч байна шүү!!!...
Наймдугаар сарын 27-нд Дүүргийн эрүү, иргэний хэргийн хялбар ажиллагааны анхан шатны тойргийн шүүхэд яллагдагчаар татагдсан Ц.Санжаачойпэлд авсан цагдан хорих таслан сэргийлэх арга хэмжээний хугацааг нэг сараар сунгаж шийдвэрлэсэн юм. Харин яллагдагчаар татагдсан “Эрэл”-ийн Эрдэнэбатын хүү Тэмүүлэн, Лувсандоржийн Алтан-Очир нар хэрэг гарснаас хойш цагдан хоригдож буй. Хэргийн талаар эргэн сануулахад, УИХ-ын гишүүн асан Цэрэнпунцагийн хүү Санжаачойпэл, “Эрэл”-ийн Эрдэнэбатын хүү Тэмүүлэн, Лувсандоржийн Алтан-Очир, Говь ХК-ийн гүйцэтгэх захирал Б.Амарсайхан нар 2025 оны долдугаар сарын 19-ний шөнө Хүүхдийн 100 орчимд хохирогч Д.С-ийн биед халдаж, эрүүл мэндэд нь хохирол учруулсан хэрэг гарсан. Долоодугаар сарын 23-нд Эрдэнэбатын Тэмүүлэн, Цэрэнпунцагийн Санжаачойпэл, Лувсандоржийн Алтан-Очир нарыг 30 хоног цагдан хорихоор болж байлаа. Улмаар наймдугаар сарын 12-нд УИХ-ын гишүүн асан Цэрэнпунцагийн хүү Санжаачойпэлийг хорих шаардлагагүй гэж үзэн сулласан.
Гэвч удалгүй наймдугаар сарын 15-нд түүнийг сулласан шүүгчийн шийдвэрийг хүчингүйд тооцож, дахин цагдан хорьсон. Үүний дараа наймдугаар сарын 21-нд Ц.Санжаачойпэлийн цагдан хориог үргэлжлүүлэх шаардлагагүй гэж шүүхээс шийдвэрлээд байв.
