“Apple” компанийн гол ханган нийлүүлэгч “Foxconn” үйлдвэр 14 настай хүүхдүүд ажиллуулж байснаа хүлээн зөвшөөрлөө. Тус үйлдвэрийн Хятадын зүүн хэсгийн Янтай дахь салбарт нь зуны сурагч солилцоогоор ирсэн хүүхдүүдийг ажиллуулдаг бөгөөд тэдний зарим нь хууль ёсоор зааж өгсөн 16 наснаас доогуур, 14 настай хүүхдүүд ч байсан гэнэ.
“Foxconn” компани “Apple”-ийн iPhone, iPad –аас гадна “Microsoft”, “Hewlett-Packard” зэрэг дэлхийн томоохон брэндүүдийн бүтээгдэхүүн, сэлбэгийг үйлдвэрлэдэг юм. Тийм ч учраас хөдөлмөрийн хууль, стандартыг чанд мөрддөг барууны компаниуд гол ханган нийлүүлэгч компанид нь гарсан энэ зөрчил дутагдлыг ноцтойгоор хүлээн авсан юм. Тиймээс “Foxconn” компанийнхаа бүх салбарт шалгалт хийж, хууль зөрчсөн өөр тохиолдол байгаа эсэхийг нягтлахаар болжээ.
Ер нь, “Foxconn” компани үйлчлүүлэгчдийнхээ чихийг байнга халууцуулдаг, асуудалтай компани. Тус үйлдвэрийн ажилчид байсхийгээд амиа хорлодог явдал өнгөрсөн жилүүдэд тогтмол гарч, томоохон шуугиан дэгдээж байсан билээ.