Засгийн газар Боловсролын зээлийн сангийн журмыг шинэчлэн баталлаа. Үүнтэй холбоотойгоор өнгөрсөн хугацаанд зээлээ төлөөгүй хүмүүсийн мэдээллийг Монголбанк руу өгсөн талаар Боловсролын сайд П.Наранбаяр хэлэв.
Тэрбээр "БЗС-д зээлтэй 14 мянган хүний мэдээллийг Монголбанкны "ХАР ЖАГСААЛТ" руу өгсөн. Эдгээр хүмүүс Монголбанкны зээлийн мэдээллийн санд авлагатай гэж бүртгэгдсэн" гэлээ.
Өмнө нь гадаадын шилдэг их дээд сургуульд тэнцсэн бол зээл олгодог байсан. Шинэчилсэн журмаар 2+2 хөтөлбөрийг хэрэгжүүлнэ. Өөрөөр хэлбэл дотоодын их сургуульд хоёр жил суралцаад гадаадын сургуульд хоёр жил суралцах тохиолдолд зээл олгоно.
Ингэснээр дотоодын дээд боловсролоо дэмжинэ мөн орон нутгийн суралцагчдад тэгш боломж олгоно гэж харж байна. Түүнчлэн зээлийг эргэн төлөх хугацааг 20 хүртэлх жилээр сунгах уян хатан нөхцөлийг тусгаж өгсөн. Их сургуулиа дуусгаад гадаадад гурав хүртэл жил ажиллаад ирж болно.
Эдгээр шийдвэрийн үр дүнд төсвийн зарцуулалтын үр ашиг нэмэгдэнэ гэж харж байна" гэв.
