Төмөр хатагтай хэмээх нэрээрээ түүхэнд бичигдэн үлдсэн Их Британийн Ерөнхий сайд асан Маргарет Тэтчер өчигдөрхөн 87 насны ойгоо тэмдэглэлээ. Нас дээр гарч, бие тэнхээ нь сайнгүй байх болсноос хойш төдийлэн олны өмнө харагдахаа больсон Тэтчер хатагтайг ойн баярын оройн зоог барихаар хүүхдүүдтэйгээ гарах үеэр англичууд харлаа. Хэдий Маргарет Тэтчер төмөр хатагтай гэгдэж байх үетэйгээ харьцуулашгүй өтөлсөн ч намбалаг сайхан хувцасладаг хэвээрээ байна шүү хэмээн харсан хүмүүс баярлан, урт удаан наслахыг ерөөж байжээ.
Гэрээсээ барагтай бол гарахаа болсон хатагтай Тэтчерийг хүү Марк болон түүний эхнэр Сара нар Грийнс хэмээх тансаг зоогийн газарт аваачин, насны ойг нь хамтдаа тэмдэглэжээ. Энэхүү ойн баярт М.Тэтчерийн охин Кэрол харагдаагүй байна.  Хатагтай Тэтчерийн охин ээжтэйгээ таарамжгүй харилцаатай байдгаас ойн баярт нь ч ирээгүй бололтой.

Сүүлийн 10 жилийн дотор хэд хэдэн удаа харваж, бие тэнхээ нь дордсон Маргарет Тэтчерийн хувьд гэртээ өөрийн дуртай түшлэгт сандал дээрээ суугаад сонгодог хөгжим сонссоор өдрийн өнгөрүүлдэг болсон хэмээн түүний ойр дотныхон хэвлэлд ярьжээ. Түүний нөхөр сэр Дэнис есөн жилийн өмнө хорвоог орхисон юм.