Мавританы Ерөнхийлөгч Мохамед Оулд Абделазиз бууны суманд өртөн шархджээ. Гэхдээ Ерөнхийлөгчийн шарх хөнгөн учир амь насанд нь аюулгүй, одоо нийслэл хотынхаа цэргийн эмнэлэгт эмчлүүлж байна гэж албаныхан мэдэгджээ.
Мавританы Харилцаа холбооны сайдын мэдэгдсэнээр армийн нэгэн албан хаагч алдаа гарган Ерөнхийлөгчийн цувааг танилгүй гал нээсэн аж. Гаранд шархдсан М.Абделазизын бие сайн, тэр өөрөө босч явж чадаж байгаа гэж албаныхан мэдээлж байна.
М.Абделазиз 2008 онд цэргийн эргэлт хийж төрийн эрхэнд гарсан юм. Түүнээс нэг жилийн дараа Ерөнхийлөгчийн сонгууль болоход өрсөлдөгчидтэй тохиролцон төрийн тэргүүний суудалдаа үлдсэн билээ.