ЖИЙЖ продакшн, MBT entertainment, Red Point media - Рэд Пойнт медиа ийн хамтран бүтээсэн “ЦӨВҮҮН ЦАГ” УСК өнөөдөр /2025.03.06/ нээлтээ хийнэ. Тус киног Монгол Улсын Гавьяат жүжигчин О.Бат-Өлзий, Б.Тамир нар хамтран найруулсан юм.
"Цөвүүн цаг" УСК-ны Бадралын дүр жүжигчин, СТА Э.Тодгэрэл тоглосон билээ. Тэрбээр манай сайтад өгсөн ярилцлагадаа "Миний тоглосон Бадрал шиг дүр өнөө цагт бараг байхгүй дээ. Улсын байгууллагад ч тэр. Төрд байгаа нөхдүүд ч тэр. Сайхан Монгол эр хүн ер нь байгаа эсэх асуудал яригдана.Киноны нэр нь хүртэл "Цөвүүн цаг". Өнөөдөр бид 21 дүгээр зуунд амьдарч байгаа мөртлөө цөвүүн цаг шиг л амьдарч байна. Кино уран бүтээл бүр нийгэмд заавал хүргэх гэсэн мессеж, болохгүй байгаа зүйлсийн талаар шүгэл үлээдэг. Эр хүн дотроо ар гэр, ахуй амьдрал төр улс гэх мэт бүх зүйлсийг тээж явдаг уул шиг хүмүүс байдаг. Тийм дүр өнөөдрийн нийгэмд байхгүй юм уу даа л гэж би харсан. Зохиолоо уншихад үнэхээр таалагдсан учраас дүр дээрээ чадан ядан ажилласан" гэдгийг онцолж байв.
