Туркийн байлдааны онгоцууд Сирийн зорчигч тээврийн онгоцыг Москвагаас Дамаск руу нисч байх үед нь хүчээр зогсоон, шалгасан байна. 180 хүний багтаамжтай Airbus А320 онгоц Москвагаас Сирийг зорин 35 зорчигчтой нисч явжээ. Тус онгоцонд зэвсэг тээвэрлэж яваа гэсэн мэдээлэл Туркийн талд ирсэн учир тус улс өөрийн агаарын орон зайгаар дамжин өнгөрч яваа онгоцыг саатуулан шалгах эрхтэй хэмээн үзэж, ийм алхам хийжээ. Онгоцыг Анкара хотын Эсенбога нисэх буудалд газардуулан шалгалт хийгээд хэдэн цагийн дараа нисэхийг зөвшөөрчээ.
Энэ талаар Туркийн Гадаад хэргийн сайд Ахмет Давутоглу “Хүн амыг бөөнөөр нь устгах ийм бурангуй дэглэм ноёрхсон улсын зэвсэг тээвэрлэлтийг хянах ёстой. Тэр тусмаа манай нутаг дэвсгэрээр дамжин зэвсэг тээвэрлэхийг хүлээн зөвшөөрөхгүй” гэсэн байна.