Оны эхний 11 сарын байдлаар Монгол Улсын нийт импортын үнийн дүн өмнөх оны мөн үеэс 26.2 хувиар өсөхөд газрын тосны бүтээгдэхүүн, суудлын автомашины импорт голлон нөлөөлжээ
Өнгөрсөн 11 дүгээр сард импортолсон суудлын автомашины тоо өмнөх оны мөн үеэс 79.1 хувиар өссөнийг Гаалийн ерөнхий газар мэдээллээ. Статистикийн үзүүлэлтийг сар тутмаар харахад 2024 он гарсаар импортолсон суудлын автомашины тоо өнгөрсөн оныхоос өссөн үзүүлэлттэй байна.
Энэ оны эхний 11 сард импортын дийлэнх хэсгийг нефтийн бүтээгдэхүүн, суудлын автомашины импорт бүрдүүлсэн хэвээр байгаа аж. Тайлант хугацаанд 115.6 мянган суудлын автомашиныг нэг тэрбум гаруй ам.доллароор импортолсон нь өмнөх оны мөн үеэс 70 гаруй хувиар өссөн үзүүлэлт боллоо. Үүнээс 108 мянгыг нь буюу бараг 94 хувийг зөвхөн Япон улсаас оруулж иржээ.
Түгжрэлийг бууруулах ажлын хүрээнд импортоор орж ирсэн автомашинд Улаанбаатарын бүртгэлтэй дугаар олгохыг өнгөрсөн сараас бүрэн зогсоогоод байна.
Нийслэлийн дугаараа орон нутагт шилжүүлбэл, сул гарсан орон тоон дээр тодорхой шалгуурыг хангаж байвал дугаар олгох юм. Мөн цахилгаан болон устөрөгчийн хөдөлгүүртэй автомашин, зөв талдаа жолооны хүрдтэй автомашин, бүрэн цахилгаан автомашин, сүүлийн 10 жил дотор үйлдвэрлэгдсэн зэрэг нь бусад тээврийн хэрэгслээс давуу буюу дугаар авах боломж нь өндөр байгаа аж. Сар бүрийн нэгний өдөр тээврийн хэрэгсэлд улсын дугаар авах хүсэлтийн дарааллыг гаргах юм байна.
"Сүүлийн 2-3 жилд Засгийн газар, нийслэлийн албан тушаалтнууд хэрэгжээгүй, хэрэгжих болоогүй шийдвэрүүд, аман мэдэгдлүүдээ зарласаар ирсэн нь зах зээлд хоосон эрэлт бий болгож, улмаар автомашины импорт огцом өсөхөд нөлөөлж буй"г МАДА ТББ-ын Гүйцэтгэх захирал С.Баасанбаяр хэлж байв.
https://www.bloombergtv.mn/news/h29v5
