Мексикийн хар тамхины бүлэглэл “Лос Зетас”-ын толгойлогч Гериберто Лацаногийн цогцсыг зэвсэгт этгээдүүд моргоос хулгайлан авч оджээ. Тэрээр цагдаагийнхны тусгай ажиллагааны үеэр буудуулан нас барсан юм. Олон жилийн турш Мексикийн хамгийн аюултай гэмт хэрэгтний жагсаалтыг тэргүүлж байсан Г.Лацаног ийнхүү устгасан явдалд олон нийт талархаж байсан ч гэмт этгээдүүд толгойлогчийнхоо цогцсыг цагдаагийнхны гарт үлдээхийг хүсээгүй бололтой.


Мексикийн зүүн хойд хэсгийг хяналтдаа авсан Лос Зетас бүлэглэл олон зуун балмад хэрэг үйлдэж байсны дотор 2004 онд нэгэн сонины эрхлэгчийн амийг хөнөөсөн гэдэг. Түүнийг барихын тулд АНУ мэдээлэл өгсөн хүнийг таван сая ам.доллараар шагнахаар амлаж байсан бол Мексикийн тал 2,3 сая ам.доллар амлаж байв. Лос Зетас бүлэглэлийг үндэслэгчдийн нэг, хамгийн нөлөө бүхий удирдагчийг устгасан нь тус мафид хүнд цохилт болно гэж эрх баригчид найдаж байна. Тус бүлэглэлийнхнийг баривчлах тусгай ажиллагааны үеэр өөр нэг толгойлогч Салвадор Алфонзо Мартинез гэгчийг барьсан бөгөөд тэрээр 2010 онд 72 хүнийг хөнөөсөн аймшигт хэргийн сэжигтэн ажээ.