Талбайн тэмцээний улирал өндөрлөж, футзалын улирал эхлэж байна. Футзал Монгол улсад хөгжих боломжтой спорт. Энэ ч утгаараа футзалын мэргэжилтнүүдийг бэлтгэх үүднээс МХБХолбоо бодлогын хүрээнд үйл ажиллагааг чиглүүлэн ажиллаж байгаа. Энэ ондоо багтаан Азийн Хөлбөмбөмбөгийн Холбоотой хамтран Футзалын Дасгалжуулагчийн курс, Дэлхийн Хөлбөмбөгийн Холбоотой хамтран Футзалын Шүүгчийн сургалтуудыг явуулахаар төлөвлөсөн.
Энэ төлөвлөгөөний дагуу Нийслэлийн Засаг дарга бөгөөд Улаанбаатар хотын захирагчийн ивээл дор Азийн Хөлбөмбөгийн Холбоотой хамтран Монголын Хөлбөмбөгийн Холбоо Футзалын дасгалжуулагчийн курсыг өнөөдрөөс эхлүүллээ. Сургагч багшаар Азийн Хөлбөмбөгийн Холбооны сургагч багш, Иран улсын иргэн ShahabeddinSofalmanesh хүрэлцэн ирсэн байна. Мөн сургалтын нээлтийн ажиллагаанд Соёл Спорт Аялал Жуулчлалын Яамны ахлах мэргэжилтэн н.Сүрэнхорлоо, МХБХ-ны Удирдах Зөвлөлийн гишүүн Р.Энхбаяр, Нийслэлийн Биеийн Тамир Спортын Газрын ахлах мэргэжилтэн Б.Батсайхан нар оролцлоо.
Сургалтад нийт 15 багш, дасгалжуулагч хамрагдаж байгаа бөгөөд сонсогчоор 10 гаруй хүмүүс хамрагдаж байгаа нь сургалтын эрэлт хэрэгцээг харуулж байгаа явдал юм.