Монгол Улсын “Тогтвортой хөгжлийн зорилго” дээд түвшний чуулга уулзалт аравдугаар сарын 4-нд Төрийн ордонд танхим болон цахимаар зохион байгуулагдлаа.
Чуулга уулзалтын зорилго нь цар тахлаас үүдсэн сөрөг нөлөөг даван туулах, эдийн засгийн сэргэлтийг хурдасгах болон 2030 онд хүрэх Тогтвортой хөгжлийн зорилгын “Арван жилийн үйл ажиллагаа” (Decade of Action)-ны хэрэгжилтийг эрчимжүүлэхэд олон талын оролцоог хангаж, санал солилцох, хамтын ажиллагааг бэхжүүлэхэд чиглэж байгаа юм.
Чуулга уулзалтаар Тогтвортой хөгжлийн зорилгыг хэрэгжүүлэхэд гарч буй ахиц дэвшил, тулгарч байгаа саад бэрхшээл болон КОВИД-19 цар тахлын үед хэрэгжилтийг эрчимжүүлэхэд чиглэсэн олон улсын сайн туршлага, арга зам, шийдлийн талаар олон талын оролцоог хангаж хэлэлцүүлэг өрнүүллээ.
Тус чуулганд Үндэсний Статистикийн Хорооны дэд дарга Д.Лхамсүрэн “Тогтвортой хөгжлийн зорилго: Мэдээллийн бэлэн байдал, тулгамдсан асуудлууд” сэдвийн хүрээнд Тогтвортой хөгжлийн зорилго, зорилтыг хянаж үнэлэх шалгуур үзүүлэлтүүдийн мэдээллийн бэлэн байдал, түүнийг тооцох, бодлого үйл ажиллагаанд хэрэглэхийн ач холбогдол, тулгамдсан асуудал болон мэдээллийн бэлэн байдлыг сайжруулах арга замын талаар илтгэл тавьж оролцлоо.
Эх сурвалж: ҮСХ
