Байгаль орчин, аялал жуулчлалын сайд Н.Уртнасан цөлжилт нэн хүндэрсэн найман аймагт ажиллаж байна. Энэ хүрээнд Баянхонгор аймагт ажиллаж, тус аймгийн Их Богдын Байгалийн цогцолборт газрын хамгаалалтын захиргаанд дараах үндсэн 5 асуудлыг шийдвэрлэлээ.
1.Захиргааны байрын асуудал нэн тулгамдаж байгааг харгалзан, төсөл, төлөвлөгөөг эдийн засгийн тооцоонд үндэслэн шийдвэрлэх, байгаль хамгаалагчдын байрыг 4 цэгт байгуулах. Энэ санхүүжилтийг төсөвт дарамт үүсгэхгүй, тухайн бүс нутагт хэрэгжиж буй Олон улсын төсвийн санхүүжилтээр шийдвэрлэхээр боллоо.
2.Цөлжилтийг сааруулах, уул уурхайн нөхөн сэргээлт хийх зорилгоор говийн бүсэд хамгаалалтын захиргаанаас 500 заг тарьсан. Усалгааг бүрэн шийдээгүйгээс ургалт муу байгаа. Иймд услалтын системийг шийдэх 15 сая төгрөгийн төсвийг төслийн хөрөнгөөс гаргахаар шийдвэрлэв.
3. Байгаль хамгаалагчдын өдөр тутмын хувцас хэрэглэл, хангамжийг сайжруулах ажлыг үе шаттайгаар зохион байгуулах, эхний ээлжид нэг фругон автомашин олгохоор болов. Албан хэрэгцээнд 2016 онд хүлээн авсан компьютерийг өнөөг хүртэл шинэчлэн сайжруулаагүй байгааг үндэслэн сансрын зураглал шаардлагатай зөөврийн компьютер шийдвэрлэхээр боллоо.
4. Нэг байгаль хамгаалагч 130 мянган га талбай хариуцан ажиллаж, орон тоо хүрэлцээгүй байгааг анхааралдаа авч, 2024 он хүртэл үе шаттайгаар орон тоог нэмэгдүүлэх, шаардлагатай санхүүжилтийг төсөвт тусгах замаар шийдэхээр тогтов. Тус хамгаалалтын захиргаанд хамрах газар нутагтайгаа харьцуулбал 4-5 байгаль хамгаалагч нэмэх шаардлагатай байна.
5. УИХ-ын 2020 оны 46-р тогтоол "Зарим газар нутгийг Улсын тусгай хамгаалалтад авах, хилийн заагт өөрчлөлт оруулах тухай"-ын хэрэгжилтийг хангуулахыг чиглэл болгов.
Мөн гар аргаар уул уурхай олборлолтоос үүссэн нөхөн сэргээлт хийх шаардлагатай 21 га талбайд техникийн болон биологийн нөхөн сэргээлтийг боломжт хувилбараар шийдвэрлэх, ирэх оны төсөвт эн тэргүүнд шаардлагатай төсвийн задаргааг ирүүлэх, тусгай хамгаалалттай газар нутагт олгосон өмчлөх эрхийг цуцлах, малчидтай холбоотой асуудлыг хуульд нийцүүлэн судлаж, шийдвэрлэхийг холбогдох албаныханд үүрэг болголоо.
