БОАЖ-ын сайд Н.Уртнасан цөлжилтийг багасгах хүрээнд Дорноговь аймагт ажиллаж, тус нутгийн нэн хүчтэй цөлжилт үүссэн хэсэгт 23000 мод тарьж ургуулаад байгаа “Шамбала-2056” төслийн ажилтай танилцлаа.
Төслийг 27-30 насны арваад залуу нэгдэн хэрэгжүүлж, сайн дурын 108 гишүүнтэйгээ өнгөрсөн хугацаанд мод үржүүлэг, хог хаягдлыг дахин боловсруулах чиглэлээр ажиллажээ. “Тогтвортой хөгжлийн бодлогыг лоозон бус үйл хэрэг болгох” уриатай залуусын нэгдэл гялгар уутыг дахин боловсруулж, эко ариун цэврийн байгууламжид зориулсан хөрсөнд нэвчилтгүй 1-10 тонн багтаамжтай танк үйлдвэрлэж, мод үржүүлгийн газар ажиллуулж байгааг салбарын сайд сайшаагаад, дэмжин хамтран ажиллахаар боллоо.
Төслийн багтай ойжуулалтын бодлого хөтөлбөрийг сайжруулах, орчны бохирдлыг багасгах, байгальд ээлтэй аялал жуулчлалыг хөгжүүлэх чиглэлд хамтран ажиллаж, эхний ээлжид “Зүгээр бүү хая” нөлөөллийн аяныг эхлүүлэх аж.
Өнгөрсөн хугацаанд найман аймагт томилолтоор явж, өрх бүрд мод тарих аяныг хэрэгжүүлж, цөлжилтийг сааруулах төсөл хөтөлбөрийн судалгааны талбайд ажилласан. Мод тарих нь хэдхэн цаг, харин ургуулах нь хэдэн жилийн ажил юм. Иймд мод ургуулах аяныг хамтран хэрэгжүүлнэ гэдгээ БОАЖ-ын сайд онцлоод, залуусын орчин үед нийцсэн санал, санаачилга салбарын хөгжил хэрэгтэй. Иймээс тэдний туршлага, мэдлэгийг дэмжин олон залуусын түүчээ болгон хамтран ажиллахаар төслийн санаачлагч, үүсгэн байгуулагч Б.Шижирбатыг Байгаль орчин, ногоон хөгжлийн бодлогын орон тооны бус зөвлөхөөр томилж байгаагаа мэгдсэн юм.
Энэ онд ойн нормативыг шинэчлэн баталж, зардлын үнэлгээг 2.5-5 дахин нэмсэн нь ойжуулалт, нөхөн сэргээлтийн үйл ажиллагаа эрхэлж буй иргэн аж ахуй нэгжүүдэд чухал шийдвэр болсон. “Шамбала-2056” төслийг цаашид тогтвортой үйл ажиллагаа явуулахад бодлогоор дэмжихээ салбарын сайд илэрхийллээ.
“2021 онд арчилгаа усалгаатай 50 мянган мод тарьж, Монголын говийг модод шуугисан төгөл болгох” зорилготой багийг дэмжин, хамтран ажиллах болсонд төслийн багийн ахлах, үүсгэн байгуулагч Б.Шижирбат талархаад, энэ хугацаанд бодитоор үлдэх тоймтой ажил хийхээр төлөвлөж байгаагаа хэллээ.
