Монгол Улсын Ерөнхийлөгчийн ивээл дор дөрөв дэхь жилдээ болж буй “Чингис хаан 2012” дэлхийн цомын тэмцээнийг манай улс амжилттай зохион байгуулж өндөрлөлөө. Тус тэмцээн нь 2016 оны Бразилийн Рио Де Жанейро хотноо болох олимпын наадмын хамгийн анхны буюу түрүүлсэн тамирчин 100, удаахь байр 60, 40 оноо  халаасалж амжилтаа бататгах, өрсөлдөгч тамирчдаа судлах тэмцээн байсан  учир тив дэлхийн спортын шилдгүүд олноор цугларлаа. Тухайлбал Унгар, БНХАУ, Словани, Чех, Киргизстан, БНСУ, Хонконг, Алжир, АНУ,  Бразил, ОХУ, зохион байгуулагч манай улсын шигшээ багийн 130 гаруй тамирчин хоёр өдрийн турш Спортын төв ордонд өрсөлдөж аваргуудаа тодруулсан юм.

БНСУ-ын шигшээ баг долоон алт, гурван мөнгө, зургаан хүрэл медальтайгаар тэмцээнийг тэргүүлсэн бол зохион байгуулагч манай улсын тамирчид дөрвөн алт, найман мөнгө, 14 хүрэл медалиар мөнгө, Япон улсын шигшээ багийн тамирчид хоёр алт, хоёр мөнгө, нэг хүрэл медалийн амжилтаар хүрэл цомын эзэд болсон юм. Тэмцээнд өндөр амжилттай оролцсон 26 тамирчин олимпын эрхийн анхны оноогоо цуглууллаа.