Хөл хорионы дэглэм суларсан эхний долоо хоногт халдварын тохиолдол буураад байсан юм. Харин сүүлийн хоёр долоо хоногийн байдлаар дотоодын халдварын тоо эргээд өсөх хандлагатай болж байна. Ялангуяа нийслэлийн 151 хороо бүхэлдээ халдварын голомт болсныг Эрүүл мэндийн яам онцоллоо.
Өнгөрсөн долоо хоногт шинээр 4724 тохиолдол нийслэлд бүртгэгдэж, 24 иргэн нас бараад байна.
Энэ сарын 30-ны байдлаар улсын хэмжээнд “коронавирус”-ийн батлагдсан нийт тохиолдол 57 мянга 512 болоод байгаа бол “Covid-19”-ийн нэн хүнд хэлбэрээр нас барсан хүний тоо 286 боллоо. Олон улсын нөхцөл байдалтай харьцуулахад гурван сая хүн амтай Монгол Улсын хувьд энэ нь өндөр үзүүлэлт болж байна. Тухайлбал: 50 гаруй сая хүн амтай БНСУ-д “коронавирус”-ийн халдварын 500-600 гаруй тохиолдол өдөрт шинээр бүртгэгдэж байгаа аж. Мөн 14 орчим сая хүн амтай Японы Токио хотод ижил нөхцөл байдалтай байна.
Үүнээс гадна Монгол Улсаас Швейцарын Холбооны улсад суугаа Онц бөгөөд бүрэн эрхт Элчин сайд Л.Пүрэвсүрэн мэдээлэхдээ есөн сая хүн амтай тус улсад халдварын тоо 800-900, мөн 3-5 хүн эндэж байна гэсэн юм. Үүнээс харахад Монгол Улсын хувьд нөхцөл байдал эрсдэлтэй нас баралт өндөр байна.
Үүний зэрэгцээ ирэх зургаадугаар сарын дунд үеэс нийт хүн амын дунд вакцины хоёр дахь тунд хамрагдаад 14 хоносон иргэдийн эзлэх хувь ихэснэ. Ийм учраас халдварын нөхцөл байдал тогтворжиж нас баралт буурах хандлага ажиглагдах хүлээлттэй байгааг эрдэмтдийн баг мэдээлсэн байна.
Дархлаажуулалтын хувьд улсын хэмжээнд 1.8 сая иргэн “коронавирус”-ийн эсрэг вакцины эхний тунг, 1.2 сая иргэн хоёр дахь тунг хийлгэжээ. Үүнээс нийслэлд зорилтот бүлгийн иргэдийн 99.6 хувь нь эхний тунд, 75.9 хувь нь хоёр дахь тунд хамрагдсан байна.
