Японы Фүкүшима мужаас өнөөдөр буюу 2021.03.25-ны өдөр “Токио-2020” зуны XXXII олимпын наадмын бамбарын буухиа эхэллээ. Нийтдээ 47 муж, 859 хот, тосгоныг дамжин 7 сарын 23-ны өдрийг хүртэл тойрно. Жилийн өмнө Грекийн ариун Олимпиад бадраасан “Мөнхийн гал” тухайн үед Японд ирсэн ч цар тахлын улмаас аялуулах хугацаа нь хойшлогдож өдийг хүрсэн юм.
Олимпын бамбарын аяллыг Фүкүшима мужаас эхлүүлж буй нь учиртай. Одоогоос 10 жилийн өмнө буюу 2011 онд Японд болсон аймшигт газар хөдлөлт, цунамигаас хамгийн их хохирол амссан нь энэ муж бөгөөд гамшгийн дараах нөхөн сэргээлт, бүтээн байгуулалтыг олон нийтэд таниулах давхар зорилготойгоор ийнхүү сонгожээ.
Олимпын цэнгэлдэхэд 2020.07.23-ны өдөр ирэх галт бамбарыг 10 000 гаруй хүн буухиална. Цар тахлаас үүдэн бүтэн жилээр хойшилсон энэ удаагийн олимп хатуу дэг журмын дор, аль болох цөөн хүн хамруулах зайлшгүй шаардлагаар бамбарын нээлтийн үйл ажиллагааг зочид болон холбогдох албаныхны тоог 60%-иар бууруулж, 160 хүний бүрэлдэхүүнтэй цомхон зохион байгуулж байна.
Түүнчлэн өнгөрсөн 7 хоногт Токио-2020 олимпын наадмыг гадаадын үзэгчгүй зохион байгуулахаар болсон. Харин дотоодын үзэгчдийг хэрхэн зохицуулах тухай шийдвэр тун удахгүй гарах юм.
