2020-2021 оны хичээлийн жилд нийслэлийн ерөнхий боловсролын сургуулиудын 1 дүгээр ангид элсэх 6 настнуудыг цахимаар бүртгэж эхлээд байна. Өнөө жил 1 дүгээр ангид элсэх хүүхдүүдийн мэдээллээр Улсын бүртгэлийн ерөнхий газраас цахим сан үүсгэжээ.
Эцэг, эх, асран хамгаалагч нар энэ сарын 3-28-ны өдрүүдэд Parent.esis.edu.mn системд мэйл хаягаараа нэвтэрч, хамран сургах тойргийнхоо сургуульд хүүхдээ элсүүлэх хүсэлт илгээж, бүртгүүлнэ. Бичиг баримтын зөрчилтэй, оршин суугаа газраасаа шилжсэн хүүхдийг 8 дугаар сарын 24-28-ны өдрүүдэд ажлын цагаар элсэх боломжтой сургуульд нь очин, бүртгүүлж болно.
2019-2020 оны хичээлийн жилд Чингэлтэй дүүргийн төрийн өмчийн 15 сургуулийн 1 дүгээр ангид элссэн хүүхдүүдийг анх удаа цахимаар бүртгэсэн юм. Өнөө жилээс нийслэлийн төрийн өмчийн сургуулиуд бүгд 1 дүгээр ангийн сурагчдыг цахимаар бүртгэж байгаа аж.
Нийслэлийн Боловсролын газрын даргын “Хамран сургах тойрог тогтоох тухай” А/36 дугаар тушаалаар 2020-2021 оны хичээлийн жилд хамран сургах тойрог тогтоожээ. Энэ тушаалын дагуу 6 настнуудыг зөвхөн өөрийн харьяаллын сургуульдаа бүртгүүлэх боломжтой.
Өнөө жил 2014 оны 1 дүгээр сарын 1-нээс 12 дугаар сарын 31-ний хооронд төрсөн 6 настай хүүхдүүдийг 1 дүгээр ангид авна. Хүн амын урьдчилсан статистик мэдээгээр 39439 хүүхэд 1 дүгээр ангид элсэх төлөвтэй байна.
