Испанийн Борха нэртэй хотын сүм нь бүр 19 дүгээр зууны үед бүтээгдсэн ханын зургаараа алдартай. Он цагийн эрхэнд ханын зурагны зарим хэсэг нь гэмтэж үйрэн бараг харагдахгүй шахуу болсон байв. Гэтэл сүмд байнга ирж мөргөл хийдэг 80 гарсан Сесилия Хименес гэгч эмээ энэхүү ханын зургийг сайн дураараа засахаар шийджээ. Тэгээд гэрээсээ бийр будаг авчирч байгаад зурагны алдагдсан хэсгүүдийг янзлан будаж эхэлжээ. Эмээг Исус бурханы хувцсыг эхлээд сэргээн будахдаа овоо гайгүй будсан бол нүүрийг нь засч эхэлтэл тун ч таагүй зүйл болсон байна. Үр дүнд нь ханын зураг дээрх Исус бурхан  танигдахгүй болтлоо өөрчлөгдөг бичин төрхтэй тэр гэхийн тэмдэггүй амьтан болж хувирчээ. Засварын үр дүнг харсан урлаг судлаачид ухаан алдаж унахаа шахсан бөгөөд баллагдсан бүтээлийг дахин сэргээх ажлын талаар сүмийн удирдлагатай хэлэлцээ хийж эхэлсэн байна. Харин хөөрхий эмээг ямар ч зөвшөөрөлгүйгээр, өөрийн дураар урлагийн үнэт бүтээлд гарсан хүрсэн гэж буруутган эрүүгийн хэрэг үүсгэж магадгүй тухай энэ хотын мэр мэдэгджээ.