Засгийн газрын хэрэгжүүлэгч агентлаг Биеийн тамир, спортын газар, Монголын Тусгай Олимпийн хороо, Монголын Хөлбөмбөгийн Холбоо хамтран зохион байгуулж буй "Спорт Бидний Бахархал" сэдэвт тусгай олимпийн футзалын тэмцээн 10-р сарын 23-нд болно.
МХБХ-ны футзалын ордонд болох уг тэмцээний техникийн зөвлөгөөн өнөөдөр амжилттай болж өнгөрлөө. Тэмцээнд 8 баг оролцох ба тусгай олимпийн дүрмийн дагуу явагдана.
Монголын Хөлбөмбөгийн Холбоо нийгмийн хариуцлагын хүрээнд оюуны бэрхшээлтэй хүүхдүүдийг хөлбөмбөг тоглох нөхцөл бололцоогоор хангаж, тэмцээн уралдааны зохион байгуулалтад нь тусалдаг.
Тэмцээнд оролцох "Сайн найз" багийн дасгалжуулагч, "UB United" клубийн дасгалжуулагч Д.Чулуунболд "Энэхүү тэмцээнийг зохион байгуулж буй МХБХ, Тусгай Олимпийн Хорооны хамт олонд баярлалаа. Тэмцээнийг зохион байгуулснаар оюуны бэрхшээлтэй хүүхдүүд нийгэмд идэвхтэй байж хөлбөмбөгөөр хичээллэх, өрсөлдөх, танилцаж, нөхөрлөх болох сайхан боломж олгодог. Дэмжин тоглогч хүүхдүүд маань ч бас юуны бэрхшээлтэй хүүхдүүдийг ойлгож, нөхөрлөх өргөн цар хүрээ, утга учиртай тэмцээн юм" хэмээн ярилаа.
