"Сэлбэ" дэд төвд барьж ашиглалтад оруулж буй 1000 шоо метр хүчин чадал бүхий усан сан, насос станцын барилгын ажлыг өчигдөр хүлээлгэн өгчээ. "Сэлбэ" дэд төвд усан сан, насос станцын барилга угсралт болон ус хангамжийн шугам хоолой нийлүүлж, суурилуулах ажлыг хийж гүйцэтгэснээр "Сэлбэ" болон "Дамбадаржаа" төвийн иргэд оршин суугчид ундны усны эх үүсвэрээр хангагдаж байгаа юм. Нээлтийн ёслолд нийслэлийн Засаг дарга бөгөөд Улаанбаатар хотын захирагч С.Амарсайхан, нийслэлийн Засаг даргын орлогч Ж.Батбаясгалан, “Улаанбаатар хотын гэр хорооллыг хөгжүүлэх хөрөнгө оруулалтыг дэмжих хөтөлбөр” төслийн ерөнхий зохицуулагч Д.Авирмэд болон албаны хүмүүс оролцсон байна.
Барилга угсралтын ажлын гүйцэтгэгчээр “Санжат” ХХК ажиллаж төлөвлөгөөний дагуу товлосон хугацаандаа ашиглалтад хүлээлгэн өглөө. Туршилт, тохируулга, угаалга шахалт, тест хийх ажил бэлэн болжээ.
Усан сангийн ойр орчмын айлууд нэг км гаруй газраас ундны усаа зөөдөг байна. Иргэд ундны усны худагтай болох хүсэлтийг ихээр тавьж байгааг төсөл хэрэгжүүлэгчид хотын захирагчид дуулгаж байв. Хотын захирагчийн зүгээс усан сангаа түшиглээд 2-3 худаг байгуулах ажлыг хийнэ гэв.
Нийслэлийн Засаг дарга бөгөөд Улаанбаатар хотын захирагч С.Амарсайхан, “Улаанбаатар хотын хамгийн чухал амин сүнс болсон цэвэр усны хангамжийн асуудлыг шийдэж, Сэлбэ, Дамбадаржаа дэд төвийн Цэвэр усны усан санг ашиглалтад оруулж байна. Энэ усан сан ашиглалтад оруулснаар ойр орчмын айл өрхүүд цаашлаад ирэх жилээс хэрэгжүүлж эхлэх орлогод нийцсэн орон сууцны үндсэн дэд бүтцүүдийн нэг. Энэ төслүүд хэрэгжиж эхэлснээр Улаанбаатар хотын барилгажих ажил эрчимтэй үргэлжлэх боломж нь бүрдэж байна” гэв.
Нээлтийн ёслолд нийслэлийн Засаг даргын орлогч Ж.Батбаясгалан, “Улаанбаатар хотын гэр хорооллыг хөгжүүлэх хөрөнгө оруулалтыг дэмжих хөтөлбөр” төслийн ерөнхий зохицуулагч Д.Авирмэд болон албаны хүмүүс оролцов.
