Монгол Улсын Засгийн газар, Боловсрол, соёл, шинжлэх ухаан, спортын яамны захиалгаар улсын төсвийн санхүүжилтээр Дархан-Уул аймагт баригдаж буй "Спорт цогцолбор"-ын барилгын ажлын явцтай салбарын сайд Ё.Баатарбилэг, БТСГ-ын дарга Ц.Шаравжамц нар танилцлаа.
Энэхүү спорт цогцолборын барилгын ажил анх 2011 онд эхэлсэн. Анхны төсөвт өртөг 11 тэрбум нь технологийн өөрчлөлт, барилгын материалын үнийн өсөлт зэргийн нөлөөнөөс 20 гаруй тэрбум болж өссөнөөс олон жил царцжээ. Ингээд 2017 оноос барилгын ажил үргэлжилж, энэ оны төсөвт 1.8 тэрбум тавигдсанаар барилгын ажлын явц 80-85  хувьтай үргэлжилж байна. Ирэх 12 дугаар сард ашиглалтанд оруулах төлөвлөгөөтэй. 
БСШУС-ын сайд Ё.Баатарбилэг цогцолборын ажилтай танилцаад төлөвлөсөн хугацаанд нь ашиглалтанд оруулахад дэмжиж ажиллахаар боллоо. Спорт цогцолбор А, В, С, D, E блокуудаас бүрдэнэ. А блок нь 2200 хүний суудалтай спорт заал байх бол Б блок нь 5 замтай 25 метрийн усан бассейнтай мөн бусад спортын төрлийн заал танхимтай байх юм. Төслийн гүйцэтгэгчээр "Химон констракшн", "Нэмбар" ХХК ажиллаж байна.