Японы Засгийн газрын “Өвсний үндэс” төслийн хүрээнд 200 сая төгрөгийн хөрөнгө оруулалтаар Сайншанд сумын ерөнхий боловсролын нэгдүгээр сургуулийн дотуур байрны их засвар болон насан туршийн боловсролын төвийг шинээр барихаар боллоо.

Боловсрол, эрүүл мэндийн салбарт хэрэгжүүлэх дээрх төслийн гэрээнд гарын үсэг зурах ёслолын ажиллагаа гуравдугаар сарын 26-нд Улаанбаатарт болж Япон Улсаас Монгол улсад суугаа Онц бөгөөд Бүрэн эрхт Элчин сайд Масато Такаока, Дорноговь аймгийн Засаг дарга Т.Энхтүвшиннар гарын үсэг зурав.

Ёслолын ажиллагаанд УИХ-ын дэд дарга Я.Санжмятав, УИХ-ын гишүүн Б. Дэлгэрсайхан, Байгаль орчин, аялал жуулчлалын сайд Н.Цэрэнбат, Эрүүл мэндийн сайд Д.Сарангэрэл зарим аймгийн Засаг дарга нар оролцсон аж.

Төслийн бүтээн байгуулалтын ажлыг энэ онд эхэлнэ. Дашрамд дурдахад “Өвсний үндэс” төслийн хүрээнд  Дорноговь аймагт өмнө нь Зүүнбаян багийн 12 жилийн сургуулийн засвар, Улаанбадрах сумын сургуулийн барилгын өргөтгөл, Нэгдсэн эмнэлгийн түргэн тусламжийн холбоо, нөөцийн цахилгаан эрчим хүчний эх үүсвэрийг нэвтрүүлэх төсөл, аймгийн гурван суманд усан хангамжийг сайжруулах төсөл гээд эрүүл мэнд, боловсролын чиглэлээр томоохон бүтээн байгуулалтыг өрнүүлж байжээ.