АНУ-ын Ерөнхийлөгч Дональд Трамп болон БНАСАУ-ын удирдагч Ким Жөн Ун нарын эхний ганцаарчилсан уулзалт лхагва гарагийн орой болно гэж Цагаан ордны хэвлэлийн албаны төлөөлөгч Сара Сандерс мэдээлэв.
Энэхүү уулзалтын дараа тэд зөвлөхүүдийн хамт оройн зоог барих ажээ. Д.Трамп мягмар гарагийн орой Вьетнамд хүрэлцэн очих юм. Тэрбээр БНАСАУ-ын удирдагчтай хийх дээд хэмжээний уулзалтын өмнө буюу лхагва гарагийн өглөө Вьетнамын удирдагчидтай уулзах ажээ.
“Хоёр орны төрийн тэргүүн нарын дараагийн уулзалтууд пүрэв гарагт болно” гэж Цагаан ордны мэдэгдэлд тэмдэглэсэн байна.
БНАСАУ-ын удирдагч Ким Жөн Ун мягмар гарагт хуягт гал тэргээрээ Вьетнам-Хятадын хилээр нэвтэрч Донгданг өртөөн дээр ирсэн тухай ТАСС агентлагийн сурвалжлагч Ханой хот дахь БНАСАУ-АНУ-ын дээд хэмжээний уулзалтын хэвлэлийн төвөөс мэдээллээ.
Төмөр замын өртөөн дээр түүнийг Лангшон мужийн эрх баригчид хүндэт харуулын хамт хүндэтгэн угтан авсан байна.
Тусгай шат суурилуулж, улаан хивс дэвссэн Донгданг өртөөний төмөр замын тавцан дээр Ким Жөн Уныг Вьетнамын Засгийн газрын тамгын газрын дарга Май Тиен Зунг угтан авсан бол хүндэт зочдыг төмөр замын буудлаас гарахад БНАСАУ-ын төрийн далбааг барьсан сургуулийн сурагчид болон дотоод, гадаадын 100 гаруй сэтгүүлч хүлээж байв. Тэд Донгданг өртөөн дээр шөнийг өнгөрүүлжээ.
Ханой хотод одоогийн байдлаар БНАСАУ-ын Төрийн Зөвлөлийн дарга Ким Жөн Ун, АНУ-ын Ерөнхийлөгч Дональд Трамп нарын хоёр дахь дээд хэмжээний уулзалтад бэлтгэх ажил дуусаж байна. Тэд энэ сарын 27, 28-нд уулзана. АНУ-БНАСАУ-ын түүхэн дэх анхны дээд хэмжээний уулзалт 2018 оны зургадугаар сарын 12-нд Сингапурт болсон бөгөөд хоёр орны удирдагчид хамтарсан баримт бичигт гарын үсэг зурсан юм. Түүнд Пхеньян Солонгосын хойгийг цөмийн зэвсгээс ангижруулах үүрэг хүлээсэн бол үүний хариуд Вашингтон аюулгүй байдлын баталгаа олгосон билээ. Харин хоёр дахь дээд хэмжээний уулзалтаар Солонгосын хойгийн байдлыг зохицуулахад хоёр орон илүү тодорхой алхамууд хийх тохиролцоонд хүрэх төлөвтэй байна.
