Олон улсын сагсан бөмбөгийн холбооны албан ёсны хуудаснаа өчигдөрхөн нэгэн шинэ мэдээ орсон нь 2019 оны 6 сард Ази тивийн тэр дундаа Монгол Улсад ФИБА 3х3-ын U18 насны дэлхийн аварга шалгаруулах тэмцээнийг албан ёсоор зохион байгуулах болсныг батламжилсан нийтлэл хэвлэгдлээ. Тус эрхийг "3х3 Олон улсын сагсан бөмбөгийн холбоо" манай улсад албан ёсоор олгох үед Монголын 3х3 сагсан бөмбөгийн холбоо"-ны ерөнхийлөгч Л.Мягмаржав хүрэлцэн очиж гарын үсэг зурсан байна. Тэрээр хэлэхдээ “Монгол Улсад U18 Дэлхийн аварга шалгаруулах тэмцээн зохион байгуулах эрх олгосонд бид их хүндэтгэлтэй хандаж байна. Тус тэмцээн нь Монгол Улсын багийн спортын түүхэнд тохиож буй, эзэн орны хувиар зохион байгуулах анхны ДАШТ юм" гэж хэлснийг дурьдсан байна.
ФИБА 3х3 U18 насны Дэлхийн аварга шалгаруулах тэмцээнд Дэлхийн шилдэг эрэгтэй, эмэгтэй 20 нийт 40 баг өрсөлдөнө. Манай шигшээ багийн хувьд тус насны ангиллаар Ази тивээс хүрэл медалийг, мөн саяхан болж өнгөрсөн Хүүхдийн олимпийн наадамд оролцсон амжилттай байгаа билээ.
