Урлаг судлалын ухааны докторант, уран бичээч Э.Ариунболд Үндэсний бичиг, соёлын өдрийг угтан, “ИЛ ХААДЫН ЗАХИДАЛ” сэдэвт уран бичлэгийн үзэсгэлэнгээ өнөөдөр Төрийн ордны Түүхийн музейд дэлгэлээ. Монгол Улсын Ерөнхийлөгчийн Тамгын газрын ивээл дор зохион байгуулж буй уг үзэсгэлэнг ЕТГ-ын дарга З.Энхболд нээж үг хэлэхдээ "Монгол Улсын Ерөнхийлөгчийн ивээл дор жил бүр уламжлал болгон зохион байгуулдаг Үндэсний бичиг үсгийн баярт зориулан бидний өвөг дээдэс, алтан ургийн Их хаадаас Европын хаадад илгээж байсан захидлуудын хуулбарыг дэлгэн үзүүлж байна. Захидлуудыг уран бичлэг-дүрслэх урлагийн хэлбэрт оруулан, уран бүтээл болгосон хүн нь уран бичигч, урлаг судлаач, докторант Э.Ариунболд юм. Эзэн Чингис хааныг залгамжлагч их хаадын энэ захидлууд нь дэлхийд гайхагдсан бичиг соёлын дахин давтагдашгүй үнэт өв төдийгүй Монголын төрт ёсны аугаа уламжлалыг илтгэн харуулсан түүхэн баримт. Энэ үзэсгэлэн нь захидлуудыг хуулбарлан цогцоор нь гаргаж байгаагаараа онцлогтой бөгөөд эх хэл, бичиг соёлоо олон нийтэд хүүхэд залууст бахархуулан таниулахад тустай юм" гэв.
Эзэнт гүрний хаадын гадаад бодлого болон ертөнцийг үзэх үзлийн тусгал болсон эдгээр захидал нь урлагийн бүтээл болохын сацуу түүхийн баримт болон үлдэж буйгаараа чухал ач холбогдолтой юм. Э.Ариунболд нь саяхан нийт Монгол туургатны дунд зохион байгуулагдсан “МИНИЙ МОНГОЛ БИЧИГ-2018” уралдааны Шилдгийн шилдэг бүтээлийн эзнээр шалгарсан. Түүнчлэн хүүхэд, залууст монгол бичиг зааж сурган, үндэсний бичиг, соёлоо түгээн дэлгэрүүлэх үйлсэд хувь нэмрээ оруулж яваа уран бүтээлч юм. Үзэсгэлэн энэ сарын 4-ний өдрийг дуустал үргэлжилнэ.
