Байт харвааны Азийн цомын тэмцээний нэгдүгээр шатны тэмцээн энэ сарын 3-8-нд Тайландын Бангкок хотноо амжилттай болж өндөрлөлөө. Энэхүү тэмцээнд оролцсон манай улсын баг тамирчид мөнгө, хүрэл медаль хүртсэн амжилт гаргасан байна.
Холимог багийн /recurve/ төрөлд ОУХМ Бишиндээгийн Урантунгалаг, ОУХМ Жанцангийн Гантөгс нар хүрэл медаль, эрэгтэй багийн /recurve/ төрөлд ОУХМ Жанцангийн Гантөгс, Баасанхүүгийн Адъяасүрэн, Баатархуягийн Отгонболд нар мөнгөн медаль хүртжээ. Алтан медалийн төлөө Энэтхэгийн багтай тай брейк гаргаж, 26-27 оноогоор хожигдсон байна. Мөн эмэгтэйчүүдийн /recurve/ хувийн төрөлд Алтангэрэлийн Энхтуяа хүрэл медалийн төлөө Энэтхэгийн Мадху Ведванд 5-6 оноогоор хожигдон дөрөвдүгээр байр эзэлжээ.
Энэ амжилтаараа манай харваачид багийн дүнгээр зургадугаар байрт орсон бол тус бүр гурван алтан медаль хүртсэн ОХУ, Энэтхэгийн баг бусдыгаа манлайлсан байна.