Монголын хөл бөмбөгийн холбоо, Катарын хөлбөмбөгийн холбооны удирдлагууд Доха хотын “Аль Бидда” цамхагт хамтран ажиллах гэрээнд гарын үсэг зуржээ.
Энэ үйл ажиллагаанд Катарын хөлбөмбөгийн холбооны ерөнхийлөгч Шэйх Хамад бин Халифа бин Ахмед Аль Тани болон МХБХ-ны ерөнхийлөгч А.Ганбаатар, Ерөнхий нарийн бичгийн дарга Ө.Шижир нар оролцжээ. Мөн Катарын талаас холбооны дэд ерөнхийлөгч, ерөнхий нарийн бичгийн дарга, ерөнхийлөгчийн ажлын албаны гүйцэтгэх захирал, стратеги төлөвлөлтийн хэлтсийн гүйцэтгэх захирал нар байлцсан бол манай талаас Монголын үндэсний шигшээ багуудын менежер гарын үсэг зурах үйл ажиллагаанд оролцсон байна.
Мөн энэ удаагийн уулзалт нь Монгол, Катар улсуудын харилцааг хөлбөмбөгөөр дамжуулан шинэ түвшинд гаргах нь дамжиггүй. Хамтын ажиллагааны гэрээ нь ерөнхий, техникийн, шигшээ багуудын гэсэн үндсэн 3 хэсэгт хуваагдаж байгаа юм. Өөрөөр хэлбэл Монголын улсын үндэсний шигшээ баг ойрын хугацаанд Катарын шигшээ багтай нөхөрсөг тоглолт хийж, бэлтгэл сургуулилалт базаахаас гадна олон зүйл дээр хамтран ажиллана. Үүгээр ч зогсохгүй Катартаа төдийгүй дэлхийн олон орныг хамарч чаддаг “Aspire academy”-д Монгол хүүхэд суралцах үүд хаалга нээгдэх боломжтой.
Холбоод хамтран ажиллах гэрээнд туршлага солилцох хэд хэдэн зүйлс байгаа дотор шигшээ багууд, өсвөрийн хөлбөмбөгчид, дасгалжуулагч, шүүгчдийн хөгжилд голчлон анхаарч ажиллах тухай тодорхой тусгасан. Тэр дундаа Спортын эмнэлэг, “Aspire academy”-д манай хөлбөмбөгчид хамрагдах үүд хаалга нээгдсэн нь таатай хэрэг юм. Энэ талаар МХБХ-ны Ерөнхийлөгч А.Ганбаатар Катарын телевизэд өгсөн ярилцлага даа “Шейх Хамад бин Калифа бин Ахмад Аль Тани Ерөнхийлөгчтэй Катарын Хөлбөмбөгийн Холбооны хамт олон биднийг хүлээн авсанд баяртай байна. Монголын Хөлбөмбөгийн Холбоо, Катарын Хөлбөмбөгийн Холбооны урт хугацааны хамтран ажиллагаа үр дүнгээ өгнө гэдэгт итгэж байна” гэжээ.