Мэргэжлийн сүмо бөхийн холбооноос Ёкозүнагийн зөвлөлтэй хамтран тэргүүлэгчдийн хурал зохион байгуулж Харүмафүжи, Таканоива нарын хэрэгтэй холбоотой хүмүүст шийтгэл оноохоор болсон билээ. Тодруулбал, Таканоивагийн багш Таканохана, Харүмафүжигийн багш Исэгахамагаас гадна ёкозүна Хакүхо, Какүрюү, сэкиваке Тэрүнофүжи, Ишира нарт шийтгэл оноохоор болсон. Учир нь, хэрэг гарах үед хамт байсан хэрнээ таслан зогсоогоогүй гэж тэднийг буруутгаж хариуцлага тооцохоор болсон нь энэ.
Тэгвэл өнөөдөр 10:00 цагт хуралдсан Ёкозүнагийн зөвлөлийн тэргүүлэгчдийн хурал 11:30 минутын үед дуусчээ. Тус хурлаар Ёкозүна Харүмафүжид зодог тайлахыг шаардсан шийдвэр гаргасан нь тохирсон шийдвэр байсан эсэх, зодог тайлсны дараа олгох мөнгөн тэтгэлгийн талаар авч хэлэлцэх байсан юм. Мөн Хакүхо, Какүрюү хоёрт оногдуулах шийтгэлийг бас хэлэлцэх байв.
Гэсэн хэдий ч хурлын уур амьсгал нэлээд ширүүн өрнөсөн бололтой. Харүмафүжиг зодог тайлахыг шаардсан нь тохирсон үйлдэл байсан гэж үзсэн гэнэ. Түүгээр ч зогсохгүй хоёр ёкозүнаг хэргийн газар байсан хэрнээ хэрэг гарах үед зогсоож чадаагүйн хариуцлагыг хөнгөн гэж үзэж болохгүй хэмээн хатуу донгодсон байна. Мөн энэ асуудалтай холбоотойгоор Таканоивагийн багш Таканоханагийн гаргасан хандлагыг зөвлөлийн гишүүд буруутгажээ.
Ямартай ч өнөөдөр болсон хурлын үйл явцаас харахад Харүмафүжи зодог тайлах нь тодорхой болох шиг боллоо. Одоо харин сүмо сонирхогчдын хамгийн их анхаарал хандуулж байгаа нэг зүйл нь прокурорын шийдвэр болоод байгаа аж. Хэрвээ Таканоива хохиролтой гэж мэдүүлэх юм бол аварга маань эрүүгийн хэргээр шийтгүүлж ч мэдэхээр байгаа юм байна. Хурлын шийдвэрүүдийг бид дахин мэдээллэх болно.