БНСУ-д гэрээгээр ажиллах хүсэлтэй иргэдээс авдаг солонгос хэлний шалгалтын журамд өөрчлөлт оржээ. Энэ тухай БНСУ-ын Аж үйлдвэр, хүний нөөцийн хэрэг эрхлэх газрын Монгол дахь төлөөлөгчийн газрын цахим хуудаснаа нийтлэгдсэн байна. Үүнд мэргэжлийн бус ажилчны буюу Е-9, далай тэнгисийн ажилчны буюу Е-10 визээр БНСУ-д таваас дээш жил оршин суугаагүй байх гэсэн нэмэлт оруулснаа бичжээ. Ийн өөрчлөлт оруулах болсон шалтгаан нь Хууль зүйн яамны Цагаачлалын тухай хуулийг дагаж мөрдөх журмын 2017 оны 11 сарын 30-ны өдрийн, Гадаад ажилчны хөдөлмөр эрхлэлтийн тухай хуулийг дагаж мөрдөх журмын 2017 оны 12 сарын 8-ны өдөр өөрчлөлт орсноор ХЭЗТ-ны СХТТШ-ын бүртгэлийн журманд адил өөрчлөлт орсон хэмээн тайлбарласан байна.