Түүхт ойгоо өрнүүн тэмдэглэсэн чуулгынхан жилийн эцсийн ажил төрлөө дүгнэж, тайлан тооцоогоо цэгцлээд их л завгүй байгаа аж. Гэсэн хэдий ч өнөөдөр чуулгын удирдлагын зүгээс ОХУ-аас зорин ирж, ЦДБЭЧ-ынхаа 85 жилийн ойн Хүндэтгэлийн тоглолтод оролцсон МУСТА, дуучин Ч.Бадралд талархлаа илэрхийлж, мөн ойн үеэр идэвх зүтгэлтэй ажиллаж, Эстрад симфони найрал хөгжмийн уран бүтээлийн CD-ийг хэвлэлтэнд бэлтгэсэн "Аялгуу" дуу бичлэгийн студийн захирал О.Төвшинтөрт ЗХЖШ-ын "Хүндэт жуух бичиг"-ийг гардуулсан байна.
Дашрамд дурдахад, дуучин Ч.Бадрал өдгөө ОХУ-ын Москва хотын Гнессиний нэрэмжит хөгжмийн академид дуурийн дуулаачийн мэргэжлээр суралцахын зэрэгцээ Олон улсын дуурийн дуу дуулаачдын томоохон уралдаануудад амжилттай оролцож, тэргүүн дэд байруудыг голчлон эзэлж, ЦДБЭЧ-ынхаа төдийгүй Монгол улсынхаа нэрийг өргөж яваа авьяаслаг дуучин билээ.
