Байгаль Орчин, Аялал Жуулчлалын яам, Юнеско-ийн Монгол дахь Үндэсний Комисс, Нэгдсэн Үндэстний Байгууллагын Залуучуудын Зөвлөх Хороо, Монголын Залуучуудын Холбоо хамтран “Уур амьсгалын өөрчлөлтөд залуучуудын анхаарлыг хандуулах нь” үндэсний хоёрдугаар чуулганыг 2017 оны 5-р сарын 20,21-ны өдрүүдэд зохион байгуулах гэж байна.
Уур амьсгалын өөрчлөлт нь энэ эриний хамгийн ноцтой сорилтуудын нэг бөгөөд түүний сөрөг нөлөөлөл нь бүх улс орнуудын тогтвортой хөгжлийг хэрэгжүүлэх боломжийг хөсөрдүүлж байна. Энэхүү чуулганаар уур амьсгалын өөрчлөлт, түүний сөрөг нөлөөллийг багасгах амьдралын хэв маяг, газрын доройтол, цөлжилт, мал аж ахуй бэлчээрийн асуудал, ойжуулах, ойг нөхөн сэргээх, ногоон байгууламж, усны бохирдол зэрэг асуудлыг хэлэлцэнэ.
Чуулганд их дээд сургуулийн оюутан залуучууд, холбогдох яамны бодлого боловсруулагчид, судлаачид, иргэний нийгэм болон олон улсын байгууллагын нийт 100 гаруй оролцогчид оролцоно. Чуулганаар гурван сэдвийн хүрээнд бүлгийн хэлэлцүүлэг өрнүүлэх юм байна. Хэсэг тус бүрт 30 хүртэлх оролцогч, 3 панелист, нэг чиглүүлэгч байна. Хэлэлцүүлгээс гарсан үр дүнг “Уур амьсгалын өөрчлөлтийн эсрэг залуучуудын оролцоог хангах нь” тунхаг бичиг баталж БОНХЯам, ЮНЕСКО-д хүргүүлэх юм.