Улаанбаатар хотод 2016-2017 оны хичээлийн жилд төрийн болон төрийн бус өмчийн 225 сургуульд 233545 сурагч суралцаж байгаагаас энэ хичээлийн жилд бага боловсролыг 19127, суурь боловсролыг 14182, бүрэн дунд боловсролыг 15062, нийт 48371 суралцагч төгсөх юм байна. Энэ жилийн хувьд төгсөгч хүүхдүүд маань өнгөрсөн жилүүдийн адил “Эрдмийн баяр” нэрийн дор баяраа тэмдэглэнэ.

Тиймээс “Эрдмийн баяр”-ын үйл ажиллагааны нэг хэсэг болгож сургууль бүр ногоон орчин бий болгохыг Нийслэлийн боловсролын газраас уриаллаа. Мөн “Эрдмийн баяр” зохион байгуулах зөвлөмжийн дагуу сургууль бүр “Боловсрол төгөл”-д 12 дугаар ангийн төгсөгчдийн нэрэмжит мод тарих ажлыг зохион байгуулахаас гадна Нийслэлийн Засаг даргын нэрэмжит “Эрдмийн аялал” аяныг 12 дугаар ангийн сурагчдын дунд зохиож, шинжлэх ухааны академийн харьяа хүрээлэн номын сан, музей, түүхийн дурсгалт газар, үндэсний үйлдвэрийн үйл ажиллагаатай танилцах аялал хийх үүрэг хүлээх нь.

Тиймээс төгсөх анги удирдаж байгаа багш нарыг энэ сардаа багтаан сурагчдадаа гэмт хэрэгт холбогдох, хэв журмын болон ёс зүйн зөрчил гаргахаас урьдчилан сэргийлэх чиглэлээр ярилцлага, уулзалт зохион байгуулахыг Нийслэлийн боловсролын газраас анхааруулсан байна.