Монгол Улсын Засгийн газар “Өргөтгөсөн санхүүжилтийн хөтөлбөр” хэрэгжүүлэхдээ найман төрлийн татвар, шимтгэл, тэтгэвэрт гарах насыг үе шаттайгаар нэмэхээр ОУВС-тай тохироо хийж Төсвийн тодотголыг УИХ-д өргөн барьсан нь иргэдийн амьдралыг сайжруулж, улс орны эдийн засгийг сэргээх биш улам дордуулж, ажил үйлчилгээ, бараа бүтээгдхүүний үнэ өсөх нөхцөл бүрдүүлж байна гэж Монголын Үйлдвэрчний эвлэлүүдийн холбоо үзэж байна.

Иймд одоо өргөн бариад байгаа Төсвийн тодотголыг батлахдаа ард түмний амьдралыг доройтуулахааргүй байж дундаж болон дунджаас доогуур орлоготой иргэдэд татвар болон үнийн дарамт учруулахааргүй шийдвэр гаргахыг УИХ-ын дарга, дэд дарга, байнгын хороодын дарга нарт санал болгожээ.

Энэ саналыг хүлээн авахгүй тохиолдолд олон нийтийн жагсаал зохион байгуулж ажил хаяхаас арагүйд хүрнэ гэж МҮЭХ-ны ерөнхийлөгч Х.Амгаланбаатар хэлж байна.