УИХ-ын Төрийн байгуулалтын байнгын хорооны дарга Н.Энхболд өчигдөр мэдээлэл өглөө. Тэрээр “УИХ-ын 2016 оны намрын ээлжит чуулганы хугацаанд нийт 17 удаа хуралдаж, давхардсан тоогоор 55 асуудлыг хэлэлцэн шийдвэрлэлээ. Мөн хуралдаанаар хуулийн төсөл 33, Улсын Их Хурлын тогтоолын төсөл 12, Байнгын хорооны тогтоол 8, Үндсэн хуулийн цэцийн 1 дүгнэлт, харьяа байгууллагын 2 тайлан, Байнгын хорооны 28 санал дүгнэлт,  Үндсэн хуулийн цэцийн 3 тайлбар, нэг төслийн эцсийн хэлэлцүүлгийн танилцуулгыг гаргасан. Иргэд, аж ахуйн нэгж, байгууллагуудаас 35 албан бичиг, 5 өргөдөл ирүүлснийг тухай бүрт нь шийдвэрлэж, хариу өгсөн” гэв.Түүчлэн УИХ-ын 2016 оны намрын ээлжит чуулганы хугацаанд Монгол Улсын Ерөнхийлөгчийн сонгуулийн тухай болон Зөвлөлдөх санал асуулгын тухай хуулийн төслийг чуулганы нэгдсэн хуралдаанаар хэлэлцүүлэх бэлтгэл хангах, санал дүгнэлтийн төсөл боловсруулах Ажлын хэсгүүд нийт 18 удаа хуралдсан байна. Мөн тус байнгын хорооноос бие даасан хууль 1, нэмэлт өөрчлөлт оруулах тухай хууль 6, УИХ-ын 12 тогтоолыг  чуулганы нэгдсэн хуралдаанаар хэлэлцүүлэн батлуулжээ.