Дэлхийн гоо бүсгүй шалгаруулах “Miss world 2016” тэмцээн АНУ-ын Вашингтон хотноо өнгөрсөн сарын 29-нд эхэлсэн. Тус тэмцээнд манай улсаас “Торго модель” агентлагийн загвар өмсөгч, мисс А.Баярцэцэг оролцож байна. Дэлхийн миссийн тэмцээн “Авьяас” төрлөөр эхэлж орон орны гоо бүсгүйчүүд өөр өөрийн авьяас чадварыг үзэгч, шүүгчдэд сонирхуулсан. Улмаар 160 гаруй орны миссийн үзүүлбэрээс шилдэг 21-ийг нь сонгон шалгаруулж, хагас шигшээд үлдээсэнд манай гоо бүсгүйн үзүүлбэр багтжээ. Тэрээр каллиграф буюу уран бичлэгийн үзүүлбэрийг илбийн урлагтай хослуулсан нь шүүгчдээс өндөр үнэлгээ авсан аж. “Авьяас” төрлийн тэргүүн байрын үзүүлбэрийг тэмцээний ерөнхий дүн гарахад танилцуулах ба нийлбэр дүнд нөлөөлөх юм.

Дашрамд сонирхуулахад, А.Баярцэцэгийн танилцуулга видео энэ жилийн дэлхийн миссийн шилдэг арван видеог тэргүүлээд байгаа юм. Тэмцээн энэ сарын 18-нд өндөрлөж, 2016 оны дэлхийн мисс тодорно.