Топ модель Д.Пүрэвсүрэн загварын тайзнаас зодог тайлжээ. Энэ талаараа тэрээр “Би дахин тайзан дээр алхахгүй. Тайзнаасаа зодог тайлсан. Харин фото моделийн чиглэлээр ажиллана. Мөн жүжигчин мэргэжлээрээ эмгэн болтлоо дурлалт бүсгүйгээс эхлээд ээж, эмээгийн дүрийг бүтээмээр байна. Надад тайзан дээр гарах олон санал ирж байгаа. Гэхдээ өөрийнхөө гоё асч яваа тэр үеийг л мөнхлөөд үлдээвэл илүү гоё юм болов уу гэж боддог. Түүнээс энэ болиосой, тайзнаас буугаасай гэж яриулах хүртлээ заавал тайзнаа алхах шаардлага байхгүй. Яг гоё байгаа дээрээ тэр чигээр нь үлдээх нь зүйтэй гэж бодож шийдсэн” хэмээн ярьсан юм.

Тэрээр сүүлийн үед өөрийн үндсэн мэргэжил болох жүжигчнээр ажиллаж чамгүй олон кинонд дүр бүтээгээд амжсан. Хамгийн сүүлд л гэхэд найруулагч Тука буюу Б.Ганболдын найруулсан “Зургаа дахь хүсэл” кинонд тоглосон билээ. Цаашид ч зохиол сайтай бүтээлд оролцох хүсэлтэй байгаа бөгөөд монголын анхны “action” эмэгтэй дүрийг бүтээх хүсэлтэй явдгаа хэлсэн байна.