Хойд Америкийн Үндэсний хоккейн лиг буюу NHL нь мельдонийг допинг гэж үзэхгүй гэдгээ мэдэгдэн хоккейчдийг хэрэглэхийг зөвшөөрсөн байна. Энэ тухай Оросын Эх газрын хоккейн лиг буюу КХЛ-ийн тэргүүн асан Александр Медведев мэдэгджээ. Тэрээр “Мельдоний бол допинг биш харин нөхөөн сэргэхэд тусалдаг бэлдмэл гэдгийг бүгд хүлээн зөвшөөрсөн. NHL бол бүр шууд мельдонийг допинг биш гээд тамирчдыг хэрэглэхийг зөвшөөрсөн” гэж хэлсэн байна.

Дэлхийн допингийн эсрэг агентлаг буюу WADA нь энэ оны нэгдүгээр сарын нэгнээс эхлэн мельдоний нэртэй бэлдмэлийг допингийн жагсаалтад оруулсан юм. Гэтэл тус бэлдмэлийн бодит нөлөө ба хүний биеэс бүрэн гардаг хугацаа зэргийг сайн тооцоогүйн улмаас өмнө нь мельдонийг хэрэглэдэг байсан олон арван тамирчид хэлмэгдсэн тул WADA ихээхэн шүүмжлүүлсэн. Иймд зарим тохиолдолд мельдоний илэрсэн тамирчдад арай зөөлөн хандах болсон. Тухайлбал, Оросын теннисчин Мария Шараповагийн цуснаас мельдоний илэрлээ гэж талбайд гарах эрхийг нь хоёр жил хассан ч тус бэлдмэлийг сайн судлаагүй гэдэг үндэслэлийн дагуу хоригийг арай эрт цуцлахаар болсон байна.