Өлссөнөөс болж бага хэмжээний хүнсний зүйл хулгайлсан бол үүнээс хойш гэмт хэрэгт тооцохгүй гэж Италийн Давж заалдах шатны дээд шүүх шийдвэрлэлээ гэж Би-би-си мэдээлсэн байна.
Үүний дагуу шүүх супермаркетаас хүнсний зүйл хулгайлсан украины иргэн Роман Остряковт оноосон зургаан сар хорьж, 100 еврогоор торгох ялыг хүчингүйд тооцжээ.
Остряков 2011 онд Генуя хотын нэгэн супермаркетаас нийтдээ дөрвөн еврогоор үнэлэгдэх хоёр зүсэм бяслаг, нэг багц зайдас хулгайлж байгаал цагдаа нарт баривчлагдсан юм.
Орон гэргүй энэ эр өлсөхийн эрхэнд ийм үйлдэл хийсэн нь гэмт хэрэг биш гэж италийн шүүх үзсэн байна.

Шүүхийн энэ шийдвэрийг италийн хэвлэлүүд “маш зөв шийдвэр” хэмээн талархан хүлээж авчээ. Хэвлэлүүд “Соёлжсон нийгэмд ядуу хүмүүс ч өлсөх ёсгүй гэдгийг шүүх харууллаа” гэж бичиж байна.
Италийн Давж заалдах шатны дээд шүүхийн шийдвэр нь эцсийнх байдаг юм байна.