Монгол Улсын Их Хурлын  2015 оны арванхоёрдугаар сарын 25-ны өдөр баталсан Сонгуулийн тухай хуулийн зарим зүйл заалт Үндсэн хуульд заасан иргэдийн сонгох, сонгогдох эрхийг зөрчиж байна хэмээн гаргасан иргэдийн гомдлыг Үндсэн хуулийн Цэц яг одоо  хэлэлцэж байна.

Сонгуулийн тухай хуулийн 7 дугаар зүйлийн 7.1.1 дэх заалтад “хувь тэнцүүлсэн /пропорциональ/;”, 120 дугаар зүйлийн 120.3 дахь хэсэгт “Улсын Их Хурлын 48-аас илүүгүй гишүүнийг олонхийн сонгуулиар, 28-аас илүүгүй гишүүнийг хувь тэнцүүлэх сонгуулиар тус тус сонгоно.” гэж заасан нь Үндсэн хуулийн Гуравдугаар зүйлийн 1, Хорин нэгдүгээр зүйлийн 2, 3, Хорин гуравдугаар зүйлийн 1 дэх хэсгийг тус тус зөрчсөн эсэхийг тогтоолгохоор иргэд Үндсэн хуулийн цэцэд хандсан юм.

Үндсэн хуулийн цэц гомдлыг хүлээн авч ийнхүү маргааныг хянан шийдвэрлэхээр хуралдаж байна.  Энэ асуудлаар УИХ-аас гишүүн Д.Лүндээжанцан, О.Баасанхүү нарыг УИХ-ын Итгэмжлэгдсэн төлөөлөгчөөр томилсон нь ҮХЦ-ийн хуралдаанд оролцож байна.

Үндсэн хуулийн цэц  иргэдийн гомдлыг хүлээн авч Сонгуулийн тухай хуулийн энэ  заалт Үндсэн хууль зөрчсөн гэж үзвэл ирэх зургадугаар сарын 29-нд болох  УИХ-ын ээлжит сонгуулиар улс төрийн намуудын егзөрүүд ард түмний ямар ч сонголтгүйгээр хууль тогтоох байгууллагад шургалдаг нь болих юм.

Үүний зэрэгцээ УИХ Сонгуулийн тухай хуулиа шинэчлэн найруулахад хүрэх болно.