“Евро 2012” –ын шөвгийн наймын эхний учраа “Португал” болон “Чех”-ын шигшээ багуудын хооронд болж өнгөрлөө. Тоглолт эхнээсээ сонирхолтой өрнөж дэлхийн шилдэг шилдэг хөлбөмбөгчин Роналду эсрэг багийнхаа хамгаалтыг нилээд сандаргаж байлаа. Хэсгийн эхний хоёр тоглолтонд гоолын олон боломж алдаж фенүүдээ гомдоогоод байсан Португал эр гурав дахь тоглолтоос өөрийн тоглолтоо буцаан авчираад байсан юм. Чехүүдийн эсрэг тэрээр багийн ахлагч хүн ямар байх ёстой, дэлхийн шилдэг хөлбөмбөгчин ямар байх ёстой түүнийгээ ухаарсан мэт тоглож багаа дараагийн шат руу хөтөллөө. Эхний үе тэнцээгээр өндөрлөсөн ч хоёрдугаар үеийн 71 дэх минутанд “Реал Мадрид” клубын шилдэг довтлогч “Криштиану Роналду” гоолдсон юм. Ингэснээр Роналду мэргэн буучдын жагсаалтыг гурван гоолтой Марио Манзукич, Марио Гомез нарын хамтаар тэргүүлж эхэллээ. Тэд дараагийн шатанд Испани болон Францын багуудын аль хожисонтой нь тоглоно.